Mkuu wa Mkoa wa Mara, Kanali Michael Mtambi, ametoa onyo kali kwa watu wote wanaojihusisha na uvuvi haramu katika Ziwa Victoria, akisisitiza kuwa waache mara moja vitendo hivyo kabla hawajakumbana na mkono wa sheria. Akizungumza na wananchi katika mkutano wa hadhara uliofanyika Kijiji cha Kwikuba, Wilaya ya Musoma, Kanali Mtambi alieleza kuwa uvuvi haramu haukubaliki na unahatarisha sana rasilimali za uvuvi katika mkoa wa Mara kwa vizazi vijavyo.
"Nawaomba wananchi wote wa Mkoa wa Mara tushirikiane kwa nguvu zote kukemea uvuvi haramu. Toeni taarifa kwa vyombo husika zitakazosaidia kuwakamata wale wote wanaofanya vitendo hivi ili waweze kuchukuliwa hatua za kisheria," alisisitiza Kanali Mtambi.
Kanali Mtambi alifahamisha kuwa Kamati ya Ulinzi na Usalama ya Mkoa wa Mara inajiandaa kufanya operesheni maalum ya kusaka na kuwakamata wavuvi haramu. Katika operesheni hiyo, kila mtu anayehusika na vitendo hivyo atatiwa mbaroni na kufikishwa kwenye vyombo vya sheria. Aliongeza kuwa uvuvi haramu umesababisha uharibifu mkubwa kwa mazingira ya Ziwa Victoria, ikiwa ni pamoja na kupungua kwa idadi ya samaki, hali ambayo imechangia kufungwa kwa baadhi ya viwanda vya kuchakata minofu ya samaki katika mkoa huo.
"Tukifanikiwa kudhibiti uvuvi haramu, idadi ya samaki itaanza kuongezeka tena, na hii itavutia wawekezaji zaidi katika viwanda vya kuchakata samaki. Hali hii itasaidia sana kuinua uchumi wa mkoa wetu na kuongeza ajira kwa wananchi," alieleza Kanali Mtambi.
Sambamba na hayo, Kanali Mtambi alisema kuwa serikali inaendelea na ukarabati wa Uwanja wa Ndege wa Musoma. Lengo la ukarabati huo ni kurahisisha usafirishaji wa samaki na bidhaa nyingine kutoka mkoa wa Mara kwenda maeneo mbalimbali ndani na nje ya nchi. "Uwekezaji huu mkubwa wa serikali hauna maana kama ndege zitakuwa zinakuja Musoma kusafirisha abiria pekee bila mizigo kama samaki. Ni lazima tuhakikishe tunalinda rasilimali zetu za uvuvi," alionya.
Kwa upande wake, Mkuu wa Wilaya ya Musoma, Juma Chikoka, alisema wilaya yake imeanzisha operesheni maalum ya kupambana na uvuvi haramu na wamejipanga kikamilifu kuhakikisha tatizo hilo linakomeshwa kabisa. "Operesheni hii itawahusu wote wanaojihusisha na uvuvi haramu bila kujali wao ni akina nani. Tunawaomba wananchi wote ambao wana taarifa kuhusu watu wanaofanya vitendo hivyo wazitoe kwetu ili tuweze kuzifanyia kazi," alisema Chikoka.
Aliongeza kuwa wilaya ya Musoma inatoa kipaumbele kwa uwekezaji katika sekta za kilimo, uvuvi, ufugaji na uchimbaji wa madini, ambazo ni nguzo muhimu za uchumi wa wananchi wake. "Pia, katika utoaji wa mikopo kwa vikundi vya wanawake, vijana na watu wenye ulemavu, miradi ya uzalishaji mali imepewa kipaumbele ili kusaidia kukuza uchumi wa wananchi," alisisitiza Chikoka.
Hatua hizi zinazochukuliwa na mkoa wa Mara zinatarajiwa kusaidia kulinda rasilimali za Ziwa Victoria, kuongeza fursa za ajira kupitia sekta ya uvuvi endelevu, na kuvutia wawekezaji zaidi katika uchumi wa mkoa huo.