Waziri Mkuu, Kassim Majaliwa, amelaani vikali tabia ya baadhi ya wananchi wasio waaminifu wanaoharibu na kuiba mabango na nguzo za anwani za makazi kwa lengo la kuziuza. Alisisitiza kuwa vitendo hivyo vinadhoofisha juhudi za serikali za kuboresha huduma za kijamii na maendeleo ya nchi.
Akizungumza jijini Dodoma wakati wa kilele cha Wiki ya Anwani za Makazi na uzinduzi wa matumizi ya Mfumo wa Anwani za Makazi, Majaliwa aliwataka wananchi kutunza miundombinu hiyo kwa sababu serikali imewekeza fedha nyingi katika ujenzi wake. "Vibao vilivyowekwa kuonesha mitaa na barabara vinaharibiwa na watu wasio waaminifu. Ni jukumu la kila mmoja kuwa mlinzi wa miundombinu hii, kwa sababu ina manufaa makubwa kwa jamii nzima," alisema Waziri Mkuu.
Waziri Mkuu alieleza kuwa suala la anwani za makazi limepewa kipaumbele katika Mpango wa Miaka Mitano wa Maendeleo wa Taifa (2021/2022 – 2025/2026). Kupitia mfumo wa kidijitali wa National Physical Addressing (NaPA), wananchi sasa wanaweza kupata maeneo muhimu kama vituo vya afya, migahawa, na huduma nyingine za kijamii kwa urahisi. "Mfumo huu ni muhimu kwa uchumi wa kidijitali. Utachochea ukuaji wa biashara mtandao, kuimarisha ulinzi na usalama, na kurahisisha upatikanaji wa huduma za kijamii," aliongeza.
Majaliwa alifafanua kuwa mfumo wa anwani za makazi utasaidia pia katika kukabiliana na majanga, kurahisisha utambuzi wa watu, na kuharakisha utoaji wa huduma za dharura.
Waziri wa Mawasiliano na Teknolojia ya Habari, Jerry Silaa, alisema wizara yake inasimamia maendeleo ya miundombinu na mifumo ya kidijitali inayochangia uchumi wa kisasa. "Mifumo ya utambuzi wa watu, biashara, ardhi, na makazi ni mihimili muhimu katika kuboresha utoaji wa huduma kwa wananchi," alisema Silaa, akisisitiza kuwa utekelezaji wa Mfumo wa Anwani za Makazi ni hatua kubwa ya kimapinduzi.
Kwa upande wa Zanzibar, Naibu Waziri wa Ujenzi, Mawasiliano na Uchukuzi, Nadir Abdulatiff Awady, alisema kazi ya kuweka anwani za makazi imekamilika kwa asilimia 100 na juhudi zinaendelea kuhamasisha wananchi kutumia anwani hizo.
Naibu Waziri wa TAMISEMI, Dk. Festo Dugange, alieleza kuwa kabla ya utekelezaji wa mfumo huo, ilikuwa vigumu kwa wageni kufika katika baadhi ya maeneo. "Hivi sasa imekuwa rahisi sana kutokana na uwepo wa anwani za makazi," alisema Dk. Dugange.
Mkuu wa Mkoa wa Dodoma, Rosemary Senyamule, alisema Jiji la Dodoma limetenga shilingi milioni 300 kwa ajili ya kuweka kamera za CCTV katika barabara za jiji hilo ili kuimarisha usalama na kuzuia uharibifu wa miundombinu. Hatua hizi zinatarajiwa kuboresha usalama wa miundombinu ya anwani za makazi na kuhakikisha mfumo huo unadumu na kunufaisha wananchi kwa miaka mingi ijayo.
Waziri Mkuu alitoa wito kwa wananchi wote kushirikiana na serikali katika kulinda miundombinu hiyo kwa maslahi ya taifa.