Wakazi wa Kijiji cha Lugala, kilichopo katika Kata na wilaya ya Malinyi, mkoani Morogoro, wameonesha furaha na shukrani zao kwa serikali kwa kuwajengea barabara ambayo imewapunguzia sana adha waliyokuwa wakiipata awali, adha ambayo ilisababisha hata vifo vya baadhi yao.
Mwenyekiti wa Kijiji cha Lugala, Erasto Mapuga, alieleza haya wakati Mwenge wa Uhuru kitaifa wa mwaka 2025 ulipozindua rasmi mradi wa barabara hiyo. Alisema kuwa hapo awali, walikuwa wakipata shida kubwa sana kuvuka mto mkubwa uliokuwa unawazuia, hasa kwa wanawake wajawazito na wagonjwa, na wakati mwingine hali ilifikia hatua ya kupoteza maisha.
"Akinamama walikuwa wakiadhirika sana wakati wakienda hospitali kujifungua. Wengine walijifungulia njiani kwa shida, na wengine walipoteza maisha kabisa kwa kukosa usafiri wa haraka. Hali hii pia iliathiri wanafunzi, ambao walishindwa kwenda shule mara kwa mara kutokana na kukosekana kwa njia salama," alisema Mapuga kwa huzuni.
Aliongeza kuwa kushindwa kuvuka mto huo kulisababisha pia shughuli za kiuchumi za kijiji kudorora. Hawakupata wateja wa kutosha kwa mpunga wao na hivyo kulazimika kuuza kwa bei ndogo kwa madalali. "Lakini sasa, kwa kujengwa kwa barabara hii na karavati, mambo yamebadilika sana. Tunapata urahisi wa kusafirisha mazao yetu na kupata wateja kwa bei nzuri," alifurahia Mapuga.
Mkazi wa kijiji cha Mchangani-Misegese, ambaye anapatikana pia wilayani Malinyi na anayeitwa Mbugani (49), naye alitoa shukrani zake kwa serikali kwa mradi huo wa ujenzi. Alisema kuwa barabara hiyo imekuwa mkombozi kwao, kwani imewaepusha na hatari ya kupanda kwenye mitumbwi mto wakati wa kusafiri, ambayo ilikuwa inatishia maisha yao. Alikumbuka kwa masikitiko jinsi wanawake wajawazito wasiopungua kumi walivyopoteza maisha kwa kushindwa kuvuka mto huo, hasa wakati wa mvua za masika.
Akisoma taarifa kuhusu ujenzi wa barabara hiyo, Meneja wa Wakala ya Barabara za Vijiji na Mijini (TARURA), Mhandisi Charles Mangela, alisema kuwa barabara hiyo na karavati lake zimejengwa kwa gharama ya shilingi milioni 199.9 za Kitanzania.
Alieleza kuwa mradi huo ulianzishwa kutokana na uharibifu mkubwa uliojitokeza kutokana na mvua za masika za El Nino na Kimbunga Hidaya, ambazo zilishuhudiwa kati ya mwezi Novemba 2023 na Mei 2024. Mvua hizo zilisababisha uharibifu mkubwa kwa miundombinu ya barabara katika wilaya hiyo, ikiwemo sehemu hiyo muhimu ya barabara ya Lugala kuelekea Misegese.
Mkimbiza Mwenge wa Uhuru Kitaifa wa mwaka 2025, Ismail Ali Ussi, alisema kuwa ujenzi wa karavati la mawe kwenye daraja hilo unaonesha wazi upendo na kujali kwa Rais Samia Suluhu Hassan kwa wananchi wake. Aliongeza kuwa wananchi nao wanapaswa kuonesha upendo wao kwa Rais kwa kusimamia na kulinda miradi yote ya maendeleo iliyopo, ili iweze kuwafikia vizazi vya sasa na vijavyo.
Akiwa katika Halmashauri ya Mlimba wilayani Kilombero, Kiongozi wa mbio za Mwenge wa Uhuru kitaifa, Ussi, alizindua pia daraja la chuma la Luipa na ujenzi wa barabara ya Kisegese - Chiwachiwa - Lavena, iliyojengwa kwa kiwango cha changarawe na udongo kwa umbali wa kilomita 5.6, na kugharimu shilingi bilioni 1.926. Miradi hii yote inaonesha juhudi za serikali katika kuboresha miundombinu na maisha ya wananchi.