Mradi mkubwa wa ujenzi wa Daraja la Kigongo-Busisi, unaovuka eneo muhimu la Ziwa Victoria na kuunganisha Wilaya za Misungwi (upande wa Kigongo) na Sengerema (upande wa Busisi) mkoani Mwanza, umefikia hatua za mwisho kabisa za kukamilika. Kwa mujibu wa taarifa iliyotolewa na Waziri mwenye dhamana, mradi huu sasa umefikia asilimia 99 ya utekelezaji wake wote, kuashiria kuwa hivi karibuni utakuwa tayari kuanza kutumika.
Taarifa hii njema imetolewa leo bungeni mjini Dodoma na Waziri wa Ujenzi, Mheshimiwa Abdallah Ulega, wakati akiwasilisha hotuba ya bajeti ya Wizara yake kwa mwaka wa fedha 2025/26. Akizungumzia umuhimu wa mradi huu pindi utakapokamilika na kuanza kazi kikamilifu, Waziri Ulega amesisitiza kuwa utakuwa na mchango mkubwa katika kuchochea ukuaji wa shughuli za kiuchumi katika Kanda ya Ziwa na hata katika nchi jirani zinazofanya biashara na Tanzania kupitia ukanda huo.
Waziri Ulega ameeleza kuwa kukamilika kwa daraja hili kutaleta faraja kubwa na mapinduzi ya usafiri kwa wakazi wa Kanda ya Ziwa na watumiaji wengine wa barabara hiyo. Amesema kero ya kutumia muda mrefu, takribani saa mbili au zaidi, kuvuka kwa kutumia vivuko vya zamani kutoka upande mmoja wa ziwa kwenda upande mwingine itakuwa historia. Baada ya daraja kuanza kutumika kikamilifu, muda wa kuvuka unatarajiwa kupungua kwa kiasi kikubwa na kufikia wastani wa dakika tatu tu, hivyo kuokoa muda na gharama kwa wafanyabiashara na wasafiri.
Aidha, Waziri amesisitiza kuwa Daraja la Kigongo-Busisi linategemewa kuwa kichocheo kikubwa cha ukuaji wa shughuli za kiuchumi, si tu ndani na nje ya mikoa ya Kanda ya Ziwa, bali pia litanufaisha nchi jirani zinazotumia bandari ya Mwanza na barabara hii kama njia ya kusafirisha mizigo, zikiwemo Uganda, Rwanda, Burundi na hata Jamhuri ya Kidemokrasia ya Kongo (DRC). Urahisi na kasi ya usafirishaji bidhaa unatarajiwa kuongeza tija na kukuza biashara ya kimataifa.
Akielezea umuhimu wa daraja hili kama alama ya maendeleo, Waziri Ulega amesema litakuwa mojawapo ya alama kubwa na fahari ya taifa letu la Tanzania. Kwa urefu wake wa kilomita 3.2, litakuwa daraja refu zaidi kujengwa katika ukanda wetu wa Afrika Mashariki na Kati, likionesha uwezo wa nchi yetu kutekeleza miradi mikubwa na ya kisasa ya miundombinu kwa fedha zetu wenyewe au kwa usimamizi wetu wa karibu.
Baada ya daraja hilo kuzinduliwa rasmi na kuanza kutumika kikamilifu, Waziri Ulega ameeleza kuwa vivuko vyote vilivyokuwa vinatumika kwenye eneo hilo la Kigongo-Busisi vitahamishiwa katika maeneo mengine nchini yatakayokuwa na uhitaji mkubwa wa huduma hiyo. Hatua hii itasaidia kuboresha usafiri majini katika maeneo mengine ambayo hayajafikiwa na miradi mikubwa ya madaraja.
Mwisho, Mheshimiwa Waziri ametoa shukrani za pekee kwa Rais Samia Suluhu Hassan kwa uongozi wake mahiri na mchango wake mkubwa katika kufanikisha mradi huu. Amesema Rais Samia si tu kwamba amehakikisha gharama zote za ujenzi zinalipwa kwa wakati kwa mkandarasi, hatua iliyowezesha kazi kuendelea bila vikwazo na kukamilika kwa kasi, lakini pia amekamilisha mradi huu ambao ulikuwa ni ndoto kubwa ya mtangulizi wake, Hayati Rais Dkt. John Pombe Magufuli. Hatua hii inaonesha mwendelezo wa miradi ya kimkakati chini ya uongozi wa Awamu ya Sita, ikilenga kuboresha maisha ya wananchi kupitia miundombinu bora.