Katika kukabiliana na wimbi la majengo kuporomoka na kuepusha maafa yanayoweza kugharimu maisha na mali, Bodi ya Usajili wa Wasanifu Majengo na Wakadiriaji Majenzi nchini (AQRB) imetoa wito mzito kwa wawekezaji wote na umma kwa ujumla. Bodi imesisitiza kuwa ni lazima kisheria kutumia wataalamu waliosajiliwa katika hatua zote za miradi ya ujenzi ili kuhakikisha usalama na ubora.
Akizungumza na wanahabari jijini Dodoma Jumatano hii, Kaimu Msajili wa Bodi hiyo, Msanifu Majengo Dk. Daniel Matondo, alisema sheria haibagui na inawataka wote wanaojenga, wakiwemo wanaosimamia majengo makubwa ya umma kama vile makanisa na misikiti, kuhakikisha wanasimamiwa na wataalamu wenye ithibati kutoka AQRB. "Kushirikisha wataalamu sio ombi, ni takwa la kisheria. Lengo ni kulinda usalama wa raia na kuepuka majanga ya majengo kuporomoka ambayo tumeona yakileta hasara kubwa nchini," alisisitiza Dk. Matondo.
Tangazo hilo limetolewa wakati Bodi ikijiandaa kwa Mkutano wake Mkuu wa Sita wa Mwaka, unaotarajiwa kuwakutanisha wadau wote wa sekta ya ujenzi jijini Arusha kuanzia Oktoba 15 hadi 17. Mkutano huo unalenga kuwa jukwaa la kujadili kwa kina changamoto na fursa zilizopo kwenye sekta hiyo muhimu kwa uchumi wa taifa.
Dk. Matondo alifafanua kuwa baadhi ya mada muhimu zitakazogusiwa ni pamoja na taratibu sahihi za upatikanaji wa vibali vya ujenzi, umuhimu wa kuzingatia usalama wa moto katika usanifu wa majengo, pamoja na usalama kwa wafanyakazi waliopo kwenye maeneo ya ujenzi. "Tutajadili pia kuhusu ujenzi endelevu unaozingatia hifadhi ya mazingira, maadili ya kitaaluma, wajibu wa kisheria kwa kila mhusika kwenye mradi, na zana za kisasa za ufuatiliaji wa miradi," aliongeza.
Bodi ya AQRB inawakumbusha wawekezaji kwamba gharama za kutumia wataalamu waliosajiliwa ni ndogo ikilinganishwa na hasara inayoweza kutokea pindi jengo linapoporomoka au kuwa na kasoro zinazohatarisha maisha ya watu.