Mkasa wa kutisha unaohusishwa na wivu wa kimapenzi umetokea katika Manispaa ya Shinyanga, ambapo mwanamke aliyetambulika kwa jina la Pendo Medusela (37) anadaiwa kusababisha kifo cha mpenzi wake, Timithoy Magesa (35), baada ya kumshambulia vikali kwa kutumia wembe.
Kamanda wa Polisi wa Mkoa wa Shinyanga, Janeth Magomi, amethibitisha kutokea kwa tukio hilo la kusikitisha, akieleza kuwa chanzo chake ni mzozo wa kimahusiano uliofikia pabaya. Inadaiwa kuwa chanzo cha yote kilikuwa ni simu aliyoipokea Pendo kutoka kwa mwanamke mwingine akitumia simu ya marehemu, akimtaka aachane na mwanaume huyo.
Kwa mujibu wa Kamanda Magomi, baada ya simu hiyo ya moto, marehemu Timithoy alimtafuta Pendo na kupanga wakutane katika nyumba ya wageni iitwayo Bwashee, iliyopo eneo la Ndala, kwa lengo la kusuluhisha tofauti zao. Hata hivyo, mazungumzo hayo yaligeuka kuwa mauti. Ilipofika majira ya saa tatu usiku mnamo Agosti 23, wawili hao wakiwa chumbani, ulizuka ugomvi mkubwa kuhusu simu hiyo.
Inadaiwa kuwa katika purukushani hiyo, Pendo alitumia wembe aliokuwa nao kumkata mpenzi wake sehemu mbalimbali mwilini. Mashambulizi hayo yalisababisha Timithoy kuvuja damu nyingi na alikimbizwa katika Hospitali ya Manispaa ya Shinyanga kwa matibabu, lakini kwa bahati mbaya alifariki dunia akiwa anapatiwa huduma.
Jeshi la Polisi linamshikilia mtuhumiwa huyo na linatarajia kumfikisha mahakamani punde upelelezi utakapokamilika. Kamanda Magomi ametoa wito kwa jamii kuacha tabia ya kujichukulia sheria mkononi na badala yake kutafuta njia za kistaarabu na za amani kutatua migogoro ya kimahusiano ili kuepuka matukio mabaya kama haya.