Katika kile kinachoonekana kama kuongeza nguvu mpya kwenye mapambano dhidi ya mila potofu nchini, Umoja wa Klabu za Waandishi wa Habari Tanzania (UTPC), kwa kushirikiana na wadau wakuu wa haki za watoto na wanawake, C-Sema na Elimika, wamezindua mkakati kabambe unaolenga kuufuta ukeketaji kwenye uso wa Tanzania ifikapo mwaka 2030.
Hatua hii imekuja wakati mwafaka ambapo vita dhidi ya Ukeketaji (FGM) katika mikoa yenye mila kali kama Mara, Arusha, Manyara na Dodoma, inahitaji zaidi ya nguvu za dola; inahitaji nguvu ya kalamu na sauti ili kubadili fikra za jamii.
Akizungumza wakati wa kutambulisha mwongozo huo mpya maalum kwa ajili ya wanahabari, Afisa kutoka UTPC, Victor Maleko, alibainisha kuwa kalamu ya mwandishi ina nguvu ya kujenga au kubomoa. Hivyo, mwongozo huu ni dira ya kuhakikisha kuwa habari za ukatili zinaandikwa kwa weledi wa hali ya juu, zikilinda utu wa mwathirika na wakati huo huo zikiibua mjadala wa kitaifa wa kukomesha vitendo hivyo.
"Kuandika habari za ukeketaji si sawa na kuandika habari za michezo au siasa. Kuna hisia, kuna maumivu, na kuna haki za kisheria za mwathirika ambazo lazima zilindwe. Mwongozo huu unakuja kuziba mwanya huo ili waandishi wetu wawe na jicho la kiuchunguzi na kiutu," alisisitiza Maleko.
Utafiti wa kina uliofanywa na taasisi hizo umebaini kuwa, licha ya nia njema ya waandishi wengi, bado kuna mapungufu katika uwasilishaji wa maudhui ya ukatili wa kijinsia, jambo ambalo linaweza kusababisha madhara zaidi kwa waathirika (re-victimization) au kupotosha ukubwa wa tatizo.
Mkurugenzi Mtendaji wa Elimika Wikiendi, James Massawe, akishirikiana na Mkurugenzi wa Miradi kutoka C-Sema, Bi. Fatuma Kamramba, walieleza kuwa mwongozo huo uliopo katika fomu ya kitabu, hautabaki makao makuu, bali utasambazwa hadi ngazi ya mikoa kupitia Klabu za Waandishi wa Habari (Press Clubs).
"Hatutoi kitabu tu na kuondoka. Tutahakikisha kila Klabu ya Waandishi wa Habari inapata nakala na tunatoa elimu ya vitendo. Lengo letu ni kuhakikisha ifikapo mwaka 2030, tunapozungumzia Tanzania bila ukeketaji, waandishi wa habari wawe wamechangia asilimia kubwa ya ushindi huo," alifafanua Massawe.
Kwa upande wa wanahabari walio katika mstari wa mbele wa mapambano hayo, Azizi Msuya, mwandishi mwandamizi kutoka mkoani Morogoro—mkoa ambao pia unapambana na changamoto za ukatili wa kijinsia—ametoa rai kwa wanahabari wenzake kutochukulia suala hili kijuujuu.
Msuya amesisitiza kuwa ukatili wa kijinsia unapaswa kuwa ajenda ya kudumu katika vyumba vya habari na si taarifa za matukio pekee. "Sisi ndio daraja kati ya wananchi na watunga sera. Tukiandika kwa weledi na ukali, tutawasukuma wabunge na serikali kuongeza bajeti na kusimamia sheria kwa ukali zaidi. Hii ni vita yetu sote," alisema Msuya.
Mwongozo huu unatarajiwa kuwa chachu ya mabadiliko, ukibadili namna vyombo vya habari vinavyoripoti masuala ya mila na desturi, kutoka kwenye kuripoti matukio ya 'msimu wa ukeketaji' kwenda kwenye uandishi wa uchunguzi na elimu endelevu itakayookoa kizazi kijacho cha watoto wa kike nchini Tanzania.