Wanafunzi na walimu wa Shule ya Sekondari Kambangwa iliyopo Kinondoni, Dar es Salaam, wamepata matumaini mapya baada ya Wakala wa Usalama na Afya Mahali pa Kazi (OSHA) kuahidi kusaidia kutatua baadhi ya changamoto kubwa zinazoikabili shule hiyo kongwe. Ahadi hiyo ya kutoa kompyuta 10, kichapishi (printer), na kukamilisha ujenzi wa uzio wa shule ilitolewa na Mtendaji Mkuu wa OSHA, Bi. Khadija Mwenda.
Bi. Mwenda, ambaye alikuwa mgeni rasmi katika Mahafali ya 26 ya Kidato cha Nne shuleni hapo, alitoa ahadi hiyo baada ya kuguswa na risala iliyowasilishwa na Mkuu wa Shule, Mwalimu Angelina Mwakalukila. Katika taarifa yake, Mkuu huyo wa Shule aliishukuru serikali kwa mafanikio mengi, ikiwemo utekelezaji wa sera ya elimu bila malipo na upatikanaji wa vitabu vya kutosha. Hata hivyo, alieleza kuwa shule inakabiliwa na uhaba wa kompyuta, ukosefu wa maktaba, uchakavu wa miundombinu, na kutokamilika kwa uzio, mambo yanayoathiri usalama na ufanisi wa taaluma.
Akijibu risala hiyo, Bi. Mwenda aliwapongeza wahitimu kwa kufikia hatua hiyo muhimu na kuwasisitiza kujiandaa vyema kwa mitihani yao ya mwisho. Aliwahimiza pia wale waliotimiza umri wa kupiga kura kushiriki katika uchaguzi mkuu ujao wa Oktoba 29 ili kuchagua viongozi bora.
Kupitia mpango wa taasisi yake wa kusaidia jamii (CSR), aliahidi kuwa OSHA itashirikiana na shule kutatua changamoto zilizowasilishwa. "Serikali imetuagiza kutenga fedha kusaidia jamii, na kupitia sera yetu, tutaisaidia shule hii kukamilisha ujenzi wa uzio na kuipatia kompyuta 10 pamoja na printa ili kurahisisha ujifunzaji wa TEHAMA," alisema Bi. Mwenda.
Kwa upande wao, Mwenyekiti wa Bodi ya Shule, Mohamed Mawinda, na Kiranja Mkuu, Brian Shirima, walitoa shukrani za dhati kwa msaada huo, wakisema utasaidia sana kuboresha mazingira ya kujifunzia kwa wanafunzi zaidi ya 1,300 wa shule hiyo iliyoanzishwa mwaka 1997.