Mshikamano na moyo wa ujirani mwema umedhihirika katika Mtaa wa Igodima, Kata ya Iganzo jijini Mbeya, baada ya wananchi kuungana na Jeshi la Zimamoto na Uokoaji kupambana na moto mkubwa ulioteketeza sehemu ya nyumba na hifadhi ya chakula cha mifugo. Tukio hilo limetokea jana mchana, huku chanzo cha moto huo kikiwa bado hakijajulikana.
Moto huo ulizuka katika nyumba ambayo haijakamilika inayomilikiwa na Bw. Petro Lulandala, ambaye wakati wa tukio hakuwa nyumbani. Mlipuko wa moto huo, ulichochewa na kiasi kikubwa cha chakula cha mifugo kilichokuwa kimehifadhiwa ndani, na kusababisha moshi mzito na ndimi za moto kuonekana angani, jambo lililoamsha taharuki kwa wakazi wa eneo hilo.
Bila kusubiri, majirani walionesha ujasiri wa hali ya juu kwa kuanza juhudi za awali za kuuzima moto huo kwa kutumia ndoo za maji, wakijaribu kudhibiti usisambae zaidi. Juhudi zao za pamoja zilipata nguvu mpya baada ya gari la Jeshi la Zimamoto na Uokoaji kuwasili na kuungana nao, hatimaye kufanikiwa kuudhibiti moto kabla haujasababisha maafa makubwa zaidi.
Akizungumza kwa masikitiko, mmiliki wa nyumba hiyo, Bw. Lulandala, alisema alipokea simu ya kushtua akiwa kazini na alipofika alikuta umati wa watu wakipambana na moto. "Nyumba yangu ilikuwa imefikia hatua ya kuezekwa, nilikuwa nimehifadhi chakula cha mifugo mle ndani. Sina cha kusema ila kuwashukuru majirani zangu na jeshi la zimamoto, ingawa nimepata hasara, lakini hakuna madhara kwa binadamu," alisema Lulandala.
Kufuatia tukio hilo, viongozi wa eneo hilo wametoa maoni yao. Mwenyekiti wa Mtaa, Bw. Ayub Mwazyele, aliwapongeza wananchi kwa moyo wao wa ushirikiano. Hata hivyo, alitumia fursa hiyo kuwakumbusha wakazi kuacha tabia ya kuweka vizuizi barabarani kama vile mchanga na matofali, akisema vinakwamisha magari ya dharura kama la zimamoto kufika eneo la tukio kwa wakati.
Naye Mgombea Udiwani wa Kata hiyo kupitia chama cha CHAUMMA, Adam Sadala, aliunga mkono hoja hiyo na kuiomba serikali kuboresha miundombinu ya barabara katika mitaa ya pembezoni ili kurahisisha huduma za dharura zinapohitajika.