Katibu Mkuu wa Wizara yenye dhamana ya Habari, Utamaduni, Sanaa na Michezo, ambaye pia ni Msemaji Mkuu wa Serikali, Bwana Gerson Msigwa, ametoa wito wa dhati kwa maafisa wa utamaduni kote nchini kuongeza kasi na umakini katika kusimamia na kuendeleza vipaji vya sanaa vinavyochipukia na vile vilivyokomaa vilivyopo katika mikoa yao. Akizungumza jijini Dar es Salaam mapema leo, tarehe 25 Aprili, 2025, katika kikao kazi kilichowakutanisha maafisa hao pamoja na maafisa maendeleo ya michezo kwenye Kituo cha Mikutano cha Kimataifa cha Julius Nyerere (JNICC), Bwana Msigwa amesisitiza umuhimu wa kuhakikisha wasanii wa mikoani wanatambuliwa, wanapewa sapoti inayostahili, na kuwezeshwa ili uwezo wao uweze kunawiri bila ya kulazimika kuhama makazi yao na kuelekea Dar es Salaam kutafuta fursa.
Bwana Msigwa alielezea wasiwasi wake juu ya hali iliyopo hivi sasa ambapo wasanii wengi wenye vipaji adimu, hususan wale wa fani ya ucheshi (comedy), wanajikuta hawana msaada wala ufuatiliaji wa kutosha kutoka kwa maafisa wa utamaduni wa maeneo wanakoishi. Ukosefu huu wa usimamizi na uwezeshaji wa karibu unadaiwa kuwa ndio chanzo kikuu cha wasanii hao kukata tamaa na kuona Dar es Salaam kama kimbilio pekee la kutafuta mafanikio, mikopo, na kutambulika kitaifa.
"Kuna hazina kubwa ya vipaji vya sanaa kule mikoani, vijana wenye akili na uwezo wa hali ya juu sana, hasa kwenye upande wa vichekesho ambao wanaweza kufanya mambo makubwa. Lakini tatizo kubwa ni kwamba hawapati mkono wa kuwasaidia kutoka kwa maafisa wetu. Hawapati nafasi za kujitangaza, hawajui pa kuanzia wala hawapati taarifa za fursa za mikopo au uwezeshaji mwingine," Katibu Mkuu Msigwa alifafanua.
Aliongeza kuwa, hali hii inapotokea, wasanii hao wanapopata hata nafasi ndogo tu ya kuelekea jijini Dar es Salaam, wanakuwa hawana sababu au hamu ya kurejea mikoani kwa sababu hawakuwahi kupata msingi imara wa sapoti kutoka kwa viongozi wa serikali walio karibu nao. Hii inasababisha kile kinachoweza kuitwa "ubongo wa vipaji" kuhama kutoka mikoani na kujikusanya sehemu moja tu, jambo ambalo halinufaishi maendeleo ya sanaa kwa ujumla katika ngazi ya taifa na mikoa husika.
Agizo hili la Bwana Msigwa linazitaka Wizara na maafisa wake kote nchini kubadilisha mfumo wa kazi na kuwa karibu zaidi na jamii ya wasanii. Wanatakiwa kutambua wasanii walio katika maeneo yao, kuelewa mahitaji yao, kuwapa ushauri wa kitaalamu, kuwaunganisha na fursa za mafunzo, masoko, na hata kuwaelimisha juu ya namna ya kupata rasilimali fedha, ikiwa ni pamoja na mikopo inayotolewa na serikali au taasisi za kifedha, ambazo zinaweza kuwasaidia kukuza kazi zao wakiwa mikoani. Kusimamia shughuli za sanaa mikoani kwa ufanisi kutasaidia si tu kukuza vipaji, bali pia kuimarisha utamaduni wa Kitanzania katika ngazi ya jamii, kuibua fursa za kiuchumi vijijini na mijini nje ya Dar es Salaam, na hivyo kuchangia katika maendeleo jumuishi ya taifa. Ni wajibu wa maafisa hawa kuhakikisha kuwa ndoto za wasanii wa Kitanzania hazifungwi na jiografia, bali zinachanua popote pale walipo nchini.